Агар дониста пои худ гузорем,
Ҳамин раҳ мебарад то дур моро,
Агар не, рост беному нишоне
Ҳамин раҳ мебарад то гӯр моро.
* * *
Аз ҳамин раҳ умри мо хоҳад гузашт,
Бехудӣ ё бехудо, хоҳад гузашт.
* * *
Онҳо, ки ба роҳи умр танҳо монданд,
Ҳар сӯй давиданду ба як ҷо монданд.
* * *
Дар ҷодаи рост каҷравон бисёранд,
Дар ҷомаи дӯст душманон бисёранд.
* * *
Дар ҷодаи зиндагӣ чи наздику чи дур,
Ҳозир бикунад ҳузуру ғоиб – маъзур.
* * *
Маҳҳо гузаранду моҳ монад боқӣ,
Эй бас гузаранду роҳ монад боқӣ.
* * *
Дар ҷодаи зиндагӣ чунон ки донӣ,
Бепир марав, ки беҷавонӣ монӣ.
Дида шуд: 205