Даъвии бисёр дорад дилсиёҳ,
Шикваи такрор дорад дилсиёҳ.
Аз забонаш гарчи мерезад асал,
Зераш аммо мор дорад дилсиёҳ.
Ҳам ба бедорию ҳам дар хоби шаб,
Қасди бад бо ёр дорад дилсиёҳ.
Дар талоши шӯҳрате зери бағал
Теғи ҷавҳардор дорад дилсиёҳ.
Дар паси сар ғайбат, аммо дар ҳузур
Шаккарин гуфтор дорад дилсиёҳ.
Аз барои ӯ муқаддас чиз нест,
Хонасӯз афкор дорад дилсиёҳ.
Нест дар олам даво худкардаро,
Чун ниҳон кирдор дорад дилсиёҳ.
Охири кораш ба расвоӣ кашад,
Бахти ноҳинҷор дорад дилсиёҳ.
Дида шуд: 408